自阿信屋三年前「瘋狂」開設零食店後，香港食品市場出現翻天覆地變化。農曆新年期間，日式糖果、禮盒等異軍突起，影響傳統年貨如金莎、藍罐曲奇等銷情。阿信屋主席林偉駿坦言，金莎等年貨已「無水位」，索性轉攻其他禮盒。
阿信屋：一盒金莎都冇賣
經營阿信屋的CEC國際（759）主席林偉駿表示，由於市場現時已充斥大量年貨禮盒水貨，故今年新年檔期，阿信屋決定「一盒金莎、藍罐曲奇」都唔會賣，轉攻其他零食及歐洲食材，「金莎真係一街都係，今年成行都賣平晒，呢家水貨每盒都冇咩錢賺，無謂仲逼入去啦！」
林偉駿指阿信屋新年仍會做回其「基本嘢」，繼續主打新款零食，近日一些特式食材最好賣，如智利鮑魚、螺頭，「仲有歐洲來的橄欖油，有汽礦泉水上個月都賣咗廿隻櫃（貨櫃）。歐元平，客人覺得啲嘢抵，所以銷情好咗。」
在香港售賣日式禮盒已有十年的一田百貨，公司行政總裁莊偉忠表示，「十年前日式禮盒好好做，因為得一田一間賣」，現時市場出現大量競爭者，雖然生意被分薄，但好處是「做大咗個餅」，而日本零食的毛利仍較傳統年貨高。
雖然一田亦有出售金莎等傳統年貨，但莊偉忠認為「金莎銷量嘅高峯期已過」；他解釋，傳統年貨廣告強勁，造成銷路暢旺感覺，聽聞有商家因「坐貨過多」，今年被迫提早「沽售」金莎。但他相信年長一輩、或內地旅客對傳統年貨仍然受落。
資料來源:香港蘋果日報
